Ескерту. Тақырып жаңа редакцияда – ҚР Туризм және спорт министрінің м.а. 31.07.2026 № 146 (25.08.2026 бастап қолданысқа енгізіледі) бұйрығымен.
"Қазақстан Республикасындағы туристік қызмет туралы" Қазақстан Республикасы Заңының 11-бабының 10-3) тармақшасына сәйкес БҰЙЫРАМЫН:
1. Қоса беріліп отырған Шетел азаматтары үшін туристік жарнаны төлеу қағидалары бекітілсін.
Ескерту. 1-тармақ жаңа редакцияда – ҚР Туризм және спорт министрінің м.а. 31.07.2026 № 146 (25.08.2026 бастап қолданысқа енгізіледі) бұйрығымен.2. Қазақстан Республикасы Мәдениет және спорт министрлігінің Туризм индустриясы комитеті Қазақстан Республикасының заңнамасында белгіленген тәртіппен:
1) осы бұйрықтың Қазақстан Республикасының Әділет министрлігінде мемлекеттік тіркелуін;
2) осы бұйрық қолданысқа енгізілгеннен кейін үш жұмыс күні ішінде оны Қазақстан Республикасы Мәдениет және спорт министрлігінің интернет-ресурсында орналастыруды;
3) осы тармақта көзделген іс-шаралар орындалғаннан кейін үш жұмыс күні ішінде Қазақстан Республикасы Мәдениет және спорт министрлігінің Заң қызметі департаментіне іс-шаралардың орындалуы туралы мәліметтерді ұсынуды қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасының Мәдениет және спорт вице-министріне жүктелсін.
4. Осы бұйрық оның алғашқы ресми жарияланған күнінен кейін күнтізбелік он күн өткен соң қолданысқа енгізіледі.
|
Қазақстан Республикасы Мәдениет және спорт министрі |
А. Оралов |
"КЕЛІСІЛДІ"
Қазақстан Республикасының
Қаржы министрлігі
"КЕЛІСІЛДІ"
Қазақстан Республикасының
Ұлттық экономика министрлігі
| Қазақстан Республикасы Мәдениет және спорт министрі 2023 жылғы 14 шілдедегі № 181 Бұйрығымен бекітілген |
Шетел азаматтары үшін туристік жарнаны төлеу қағидалары
Ескерту. Қағидалар жаңа редакцияда – ҚР Туризм және спорт министрінің м.а. 31.07.2026 № 146 (25.08.2026 бастап қолданысқа енгізіледі) бұйрығымен.
1-тарау. Жалпы ережелер
1. Осы Шетел азаматтары үшін туристік жарнаны төлеу қағидалары (бұдан әрі – Қағидалар) "Қазақстан Республикасындағы туристік қызмет туралы" Қазақстан Республикасы Заңының 11-бабының 10-3) тармақшасына сәйкес әзірленген және шетел азаматтары үшін туристік жарнаны төлеу тәртібін айқындайды.
2. Осы Қағидаларда мынадай негізгі ұғымдар пайдаланылады:
1) жергілікті атқарушы орган (әкімдік) – тиісті аумақта жергілікті мемлекеттік басқару және өзін-өзі басқаруды өз құзыреті шегінде жүзеге асыратын астана, облыс, республикалық маңызы бар қала, аудан (облыстық маңызы бар қала) әкімі басқаратын алқалы атқарушы орган;
2) жергілікті өкілді орган (бұдан әрі – мәслихат) – облыстың, республикалық маңызы бар қаланың және астананың немесе ауданның (облыстық маңызы бар қаланың) халқы сайлайтын, халықтың еркін білдіретін және Қазақстан Республикасының заңнамасына сәйкес оны іске асыру үшін қажетті шараларды айқындайтын және олардың жүзеге асырылуын бақылайтын сайланбалы орган;
3) туристерді орналастыру орындары – туризм объектілері, қонақүйлер, мотельдер, кемпингтер, туристік базалар, қонақжайлар, демалыс үйлері, пансионаттар және туристерді уақытша орналастыру мен оларға қызмет көрсету үшін пайдаланылатын өзге де ғимараттар мен құрылыстар;
4) уәкілетті орган – туристік қызмет саласындағы мемлекеттік басқару функцияларын жүзеге асыратын орталық атқарушы орган;
5) шетел азаматтары – Қазақстан Республикасының азаматтары болып табылмайтын және өзінің басқа мемлекеттің азаматтығына тиесілі екендігінің дәлелі бар адамдар;
6) шетел азаматтары үшін туристік жарна операторлары (бұдан әрі – операторлар) – қалалар мен аудандардағы хостелдерді, қонақжайларды, жалға берілетін тұрғын үйлерді қоспағанда, туристерді орналастыру орындарын ұсынатын тұлғалар;
7) шетел азаматтары үшін туристік жарна – қалалар мен аудандардағы хостелдерді, қонақжайларды, жалға берілетін тұрғын үйлерді қоспағанда, туристерді орналастыру орындарында болған әрбір тәулік үшін туристерден алынатын төлем.
2-тарау. Шетел азаматтары үшін туристік жарнаны төлеу тәртібі
3. Шетел азаматтары үшін туристік жарна туристерден қалалар мен аудандардағы хостелдерді, қонақжайларды, жалға берілетін тұрғын үйлерді қоспағанда, туристерді орналастыру орындарында болған әрбір тәулік үшін алынады (бұдан әрі – туристік жарна).
Төленуге тиіс туристік жарна сомасы тұру құнына енгізілмейді.
Туристік жарнаны төлеушілер шетел азаматтары немесе шетел азаматының тұруына ақы төлейтін жеке немесе заңды тұлғалар (шақырушы тарап, туроператор) болып табылады.
4. "Қазақстан Республикасындағы жергілікті мемлекеттік басқару және өзін-өзі басқару туралы" Қазақстан Республикасының Заңына сәйкес туристік жарна мөлшерлемелерін жергілікті атқарушы орган осы Қағидалардың негізінде әзірлейді және тиісті мәслихатқа бекітуге ұсынады.
5. Туристік жарнаға орналастыру орындарында болу құнының 0 (нөл) пайызы мөлшеріндегі мөлшерлеме қолданылады.
6. Туристік жарна мөлшерлемесінің мөлшері өткен жылдың ұқсас кезеңімен салыстырғандағы өзекті статистикалық деректер негізінде айқындалады.
Бұл ретте осы Қағидалардың 5-тармағында белгіленген мөлшер шегінде, бірақ жылына екі реттен жиі емес, маусымдыққа байланысты туристік жарна мөлшерлемесін өзгертуге жол беріледі.
7. Операторлар туристік жарнаны шетел азаматтарын орналастыру орындарында тіркеу кезінде олардың жеке басын куәландыратын құжаттарын көрсеткен кезде алады.
Бұл ретте операторлар шетел азаматтарын немесе шетел азаматы үшін туристік жарнаны төлейтін тұлғаларды орналастыру орындарында тіркеуге дейін туристік жарна туралы хабардар етеді.
8. Шетел азаматы немесе шетел азаматы үшін туристік жарнаны төлеген жеке не заңды тұлға орналастыру орнынан кеткен кезде оператор туристік жарнаның төленгенін растайтын құжат береді.
9. Қазақстан Республикасы Бюджет кодексінің 9-бабының 2-тармағына сәйкес шетел азаматтары үшін туристік жарна астана, республикалық маңызы бар қала және аудандар (облыстық маңызы бар қала) бюджеттеріне түсетін салықтық емес түсім болып табылады.
10. Операторлар төленген туристік жарнаның есебін жүргізеді және тоқсан сайын, есепті тоқсаннан кейінгі айдың 20 (жиырмасыншы) күнінен кешіктірмей туристік жарнадан түскен сомаларды жергілікті бюджетке аударады.
11. Жергілікті атқарушы орган туристерді өзінің ресми интернет-ресурсы және әлеуметтік желілері арқылы, сондай-ақ ортақ пайдаланылатын орындарда (вокзалдарда, әуежайларда) қазақ, орыс және ағылшын тілдерінде туристік жарнаны төлеу қажеттігі туралы хабардар етеді.
