"Азаматтық қорғау туралы" Қазақстан Республикасының Заңының 11-бабының 71) тармақшасына сәйкес Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған Бес және одан да көп адам қаза тапқан қауіпті өндірістік объектідегі еңбек қызметіне және аварияға байланысты емес жазатайым оқиғаларды тергеп-тексеру жөнінде үкіметтік комиссия құру қағидалары бекітілсін.
2. Осы қаулы алғашқы ресми жарияланған күнінен бастап күнтізбелік он күн өткен соң қолданысқа енгізіледі.
|
Қазақстан Республикасының Премьер-Министрі |
О. Бектенов |
| Қазақстан Республикасы Үкіметінің 2025 жылғы 1 қазандағы № 813 қаулысымен бекітілген |
Бес және одан да көп адам қаза тапқан қауіпті өндірістік объектідегі еңбек қызметіне және аварияға байланысты емес жазатайым оқиғаларды тергеп-тексеру жөніндегі үкіметтік комиссия құру қағидалары
1-тарау. Жалпы ережелер
1. Осы Бес және одан да көп адам қаза тапқан қауіпті өндірістік объектідегі еңбек қызметіне және аварияға байланысты емес жазатайым оқиғаларды тергеп- тексеру жөнінде үкіметтік комиссия құру қағидалары "Азаматтық қорғау туралы" Қазақстан Республикасының Заңы 11-бабының 71) тармақшасына сәйкес әзірленген және бес және одан да көп адам қаза тапқан қауіпті өндірістік объектідегі еңбек қызметіне және аварияға байланысты емес жазатайым оқиғаларды тергеп-тексеру жөнінде үкіметтік комиссия (бұдан әрі – үкіметтік комиссия) құру тәртібін айқындайды.
2. Үкіметтік комиссия құрудың мақсаты бес және одан да көп адам қаза тапқан қауіпті өндірістік объектідегі еңбек қызметіне және аварияға байланысты емес жазатайым оқиғаларды (бұдан әрі – жазатайым оқиғалар) тергеп-тексеру болып табылады.
2-тарау. Үкіметтік комиссия құру тәртібі
3. Жазатайым оқиға болған тиісті саладағы мемлекеттік саясатты қалыптастыруға және іске асыруға жауапты мемлекеттік орган (бұдан әрі –мемлекеттік орган) жазатайым оқиға болған сәттен бастап бір тәулік ішінде Қазақстан Республикасының Президентіне немесе Премьер-Министріне үкіметтік комиссия құру туралы ұсыныспен орын алған жазатайым оқиға туралы жазбаша нысанда хабар береді.
4. Қазақстан Республикасы Президентінің немесе Премьер-Министрінің тапсырмасы негізінде мемлекеттік орган үкіметтік комиссия құру туралы Қазақстан Республикасының Премьер-Министрі өкімінің жобасын әзірлейді және Қазақстан Республикасы Үкіметінің Аппаратына бекітуге енгізеді.
5. Үкіметтік комиссия құрамы: төраға, төрағаның орынбасары және комиссия мүшелерінен тұрады.
Үкіметтік комиссия құрамына:
1) төраға ретінде Қазақстан Республикасының Премьер-Министрі немесе Қазақстан Республикасы Премьер-Министрінің осы салаға жетекшілік ететін орынбасары;
2) төрағаның орынбасары ретінде мемлекеттік органның бірінші басшысы;
3) комиссия мүшелері ретінде мүдделі мемлекеттік органдардың басшыларының бірінші орынбасарлары;
4) комиссия мүшелері ретінде облыстардың, республикалық маңызы бар қалалардың және астананың әкімдері немесе әкімдердің орынбасарлары кіреді.
6. Үкіметтік комиссияның шешімі хаттамамен ресімделеді, оған төраға, төрағаның орынбасары және комиссия мүшелері қол қояды.
